हिंदजागर न्यूज, प्रतिनिधी – पुणे – अभिनेता गोविंदा यांची रिव्हॉल्व्हर कपाटात ठेवताना त्यातून गोळी सुटून त्यांच्या पायाला लागल्याची घटना घडली होती. अशीच घटना राज्याचे आरोग्य मंत्री तानाजी सावंत यांच्या सुरक्षा रक्षकाच्या घरात घडली आहे.यात एक मुलगा गंभीर जखमी झाला आहे. त्याला पुण्यातील रुग्णालयात दाखल करण्यात आले आहे.
काय आहे प्रकरण ?
शिवसेना शिंदे गटाचे नेते तथा राज्याचे सार्वजनिक आरोग्य मंत्री तानाजी सावंत यांचा धनकवडी येथे बंगला आहे. या बंगल्यावर सुरक्षेसाठी तैनात सुरक्षा रक्षकाच्या घरी राऊंडने भरलेली रिव्हॉल्व्हर कपाटातून खाली पडली आणि त्यातून सुटलेल्या गोळीने 13 वर्षांचा मुलगा गंभीर जखमी झाला आहे.
या प्रकरणी सहकारनगर पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, सुरक्षा रक्षकाने रिव्हॉल्व्हरमध्ये राऊंड भरुन रिव्हॉल्व्हर बॅगेत कपाटात ठेवले होते. मुलाचा धक्का लागून बॅग खाली पडली आणि रिव्हॉल्व्हरमधून गोळी सुटून 13 वर्षाच्या मुलाच्या पायाला लागली. यात मुलगा गंभीर जखमी झाला आहे. गोळी लागून जखमी झालेल्या मुलाचे नाव अभय शिर्के (वय 13) असे आहे. या प्रकरणी पोलीस हवालदार हेमंत राऊत यांनी सहकारनगर पोलीस ठाण्यात फिर्याद दिली आहे. त्यानुसार पोलिसांनी नितीन हनुमंत शिर्के (वय 40) यांच्यावर गुन्हा दाखल केला आहे.
नितीन शिर्के हे मंत्री तानाजी सावंत यांच्या धनकवडीतील बंगल्यावर सुरक्षा रक्षक म्हणून काम करतात. त्यांच्याकडे परवाना असलेली रिव्हॉल्व्हर आहे. त्यांनी आपल्या रिव्हॉल्व्हरमध्ये राऊंड भरुन रिव्हॉल्व्हर असलेली बॅग कपाटात ठेवली. त्यांचा मुलगा अभय शिर्के याने कपडे घेण्यासाठी कपाट उघडले. त्याने शर्ट घेतला. त्यानंतर पँट घेत असताना धक्का लागून कपाटातील रिव्हॉल्व्हर असलेली बॅग खाली पडली. बॅग खाली पडताच रिव्हॉल्व्हरमधून गोळी सुटली. ती अभयच्या उजव्या पायाच्या पोटरीला लागून तो जखमी झाला. त्याला रुग्णालयात दाखल करण्यात आले आहे. रुग्णालयातून या घटनेची माहिती पोलिसांना याची माहिती देण्यात आली.
याआधीही पुण्यात एका माजी नगरसेवकाच्या रिव्हॉल्व्हरमधून गंमतीने हॉटेलच्या भिंतीवर फायरिंग करण्यात आल्याची घटना घडली होती.
— गणेश मारुती जोशी.
