हिंदजागर ऑनलाईन न्यूज पोर्टल | पुणे — अतिक्रमण हटवण्यासाठी सत्ताधारी पक्षाच्या नगरसेवकांनाच आंदोलन करावे लागत असेल, तर प्रशासनावर सत्ताधाऱ्यांचा अंकुश किती, असा सवाल नगरसेवक अमोल बालवडकर यांनी उपस्थित केला आहे. अतिक्रमणे, कचरा आणि वाहतूक कोंडी सोडवण्यात भाजप नेतृत्व अपयशी ठरत असल्याची टीका त्यांनी केली.
पदपथ अडले, कारवाईचे घोडे कुठे अडले?
अतिक्रमणांमुळे पादचाऱ्यांची जागा आक्रसत असून वाहतुकीत अडथळे निर्माण होत असल्याचे बालवडकर म्हणाले. प्रशासनाने विशेष मोहीम राबवून ठोस कारवाई करावी, अशी मागणी त्यांनी केली.
खर्चाचा आकडा मोठा; स्वच्छतेचा परिणाम कुठे?
स्वच्छतेवर निधी खर्च होत असतानाही कचरा साचत असल्याचा आक्षेप त्यांनी नोंदवला. करदात्यांच्या पैशातून होणाऱ्या खर्चाचे परिणाम रस्त्यांवर दिसावेत आणि हलगर्जीपणासाठी अधिकाऱ्यांची जबाबदारी निश्चित व्हावी, अशी त्यांची मागणी आहे.
कोंडीत नागरिकांचा वेळ आणि इंधनाचा बळी
बाणेर-बालेवाडीसह विविध भागांतील कोंडीकडे लक्ष वेधत बालवडकर यांनी प्रभावी वाहतूक नियोजनाची गरज मांडली. नागरिकांच्या रोजच्या अडचणी सोडवण्याला महापालिका आणि सत्ताधाऱ्यांनी अग्रक्रम द्यावा, असे त्यांनी सांगितले.
बातमीदार — गणेश मारुती जोशी



