पुणे | हिंदजागर ऑनलाईन न्यूज – पुणे परिसरात प्रतिबंधित गुटखा आणि पानमसाल्याची वाहतूक करणाऱ्यांविरोधात महाराष्ट्र अन्न व औषध प्रशासनाने (FDA) मोठी कारवाई केली आहे. तब्बल सहा तासांच्या पाठलागानंतर चाकण परिसरात संशयित ट्रक अडवण्यात यश आले.कारवाईदरम्यान ट्रकमधून ₹1 कोटी 13 लाख 54 हजार 600 रुपये किमतीचा प्रतिबंधित गुटखा व पानमसाल्याचा साठा जप्त करण्यात आला.
ट्रकने मार्ग बदलला, तरी पथकाने सोडला नाही पाठलाग – वृत्तानुसार, मध्य प्रदेशातून समृद्धी महामार्गाच्या दिशेने आलेला ट्रक भिवंडीकडे जाण्याऐवजी पुण्याच्या दिशेने वळल्याची माहिती FDA पथकाला मिळाली. त्यानंतर संबंधित वाहनाचा माग काढण्यास सुरुवात झाली. जवळपास सहा तास पाठलाग केल्यानंतर अखेर चाकण-तळेगाव चौक परिसरात ट्रक ताब्यात घेण्यात आला.
चौघांसह कंपनीविरोधात गुन्हा या प्रकरणात चार व्यक्तींसह एका कंपनीविरोधात गुन्हा दाखल करण्यात आल्याचे वृत्त आहे. तसेच या प्रकरणातील आरोपींवर महाराष्ट्र संघटित गुन्हेगारी नियंत्रण कायद्यानुसार (MCOCA) कारवाई करता येऊ शकते का, याची तपासणी करण्याची मागणी पोलिसांकडे करण्यात आली आहे.
प्रतिबंधित तंबाखूजन्य पदार्थांच्या अवैध वाहतुकीविरोधात झालेली ही कारवाई महत्त्वाची मानली जात असून, इतका मोठा साठा नेमका कुठून आला आणि तो कोणाकडे पोहोचवला जाणार होता, याबाबत पुढील तपासातून अधिक माहिती समोर येण्याची शक्यता आहे.
हिंदजागर ऑनलाईन न्यूज पोर्टल, पुणे
बातमी सत्याची… आवाज जनतेचा!
