हिंदजागर ऑनलाईन न्यूज पोर्टल – पुणे, १४ नोव्हेंबर २०२६ – फर्ग्युसन कॉलेज रोडवरील प्रसिद्ध वैशाली आणि रूपाली या दोन्ही उपाहारगृहांचे अन्न व्यवसाय परवाने अन्न व औषध प्रशासनाने (एफडीए) तात्काळ प्रभावाने निलंबित केले आहेत. १३ नोव्हेंबर रोजी झालेल्या तपासणीत अन्न तयार करण्याची जागा, कच्च्या मालाची साठवण आणि स्वच्छता व्यवस्थेत त्रुटी आढळल्यानंतर ही कारवाई करण्यात आली.
वैशालीत स्वच्छतागृहांलगत अन्न तयार करण्याची आणि साठवणुकीची व्यवस्था
कच्चा माल ठेवण्यासाठी वापरण्यात येणारा फ्रीजर महिलांच्या स्वच्छतागृहाजवळ, तर डोसा आणि उत्तप्पा तयार करण्याचा तवा पुरुषांच्या स्वच्छतागृहाजवळ असल्याचे तपासणीत आढळले. धुतलेली भांडीही स्वच्छतागृहासमोरील टेबलावर ठेवलेली होती. यापूर्वी जूनमध्ये सुधारणा करण्याची नोटीस दिल्यानंतरही पुन्हा त्रुटी आढळल्याने प्रशासनाने परवाना निलंबित केला.
रूपालीत साफसफाई आणि कचरा व्यवस्थापनात त्रुटी
रूपालीमध्ये साफसफाई अपुरी असल्याचे आणि कचऱ्याचे व्यवस्थापन योग्य पद्धतीने होत नसल्याचे तपासणीत आढळले. सुनावणीनंतर १३ नोव्हेंबर रोजी रूपालीच्या अन्न व्यवसाय परवान्याच्या निलंबनाचा आदेश देण्यात आला.
ग्राउंड रिपोर्टर – गणेश मारुती जोशी
