हिंदजागर ऑनलाईन न्यूज पोर्टल | पिंपरी-चिंचवड
पिंपरी-चिंचवड : मानलेल्या बहिणीची छेड काढल्याचा राग मनात धरून तरुणाला जाब विचारण्यासाठी बोलावले आणि साथीदारांसह केलेल्या जबर मारहाणीत त्याचा मृत्यू झाल्याची घटना वाकड परिसरात घडली. या प्रकरणात वाकड पोलिसांनी वेगाने तपास करत खुनाचा गुन्हा उघडकीस आणून चौघांना अटक केल्याची माहिती समोर आली आहे.
मृत तरुणाचे नाव मारोती बाळासाहेब बनसोडे (वय ३५, रा. दत्तनगर, चिंचवड)** असे आहे. याप्रकरणी त्यांच्या आई सुगीत लक्ष्मण गायकवाड (वय ७४, रा. बोराडेवाडी, मोशी) यांनी वाकड पोलीस ठाण्यात फिर्याद दिली आहे.
फिर्यादीतील माहितीनुसार, आरोपी अमित दशरथ साळुंखे याच्या मानलेल्या बहिणीची मारोती बनसोडे यांनी छेड काढल्याचा राग अमितच्या मनात होता. त्यातून अमितने साथीदारांसह संगनमत करून बनसोडे यांना जाब विचारण्यासाठी बोलावले. त्यानंतर कावेरीनगर भाजी मंडईसमोरील मोकळ्या जागेत नेऊन त्यांना जबर मारहाण करण्यात आली. गंभीर दुखापतीमुळे बनसोडे यांचा मृत्यू झाला, असे फिर्यादीत नमूद करण्यात आले आहे.
घटनेनंतर संशयित घटनास्थळावरून पसार झाले. सुरुवातीला मृत व्यक्तीची ओळख पटलेली नसल्याने पोलिसांसमोर तपासाचे आव्हान होते. मात्र, पोलिसांनी घटनास्थळाची पाहणी करून परिसरातील सीसीटीव्ही फुटेज तपासले आणि संशयितांचा माग काढला.या प्रकरणात पोलिसांनी अमित दशरथ साळुंखे (वय २६), किशोर सुभाष वाघमारे (वय ३९), भारत संजय पवार (वय २३) आणि किरण अंकुश उमाप (वय २८) यांना अटक केल्याचे वृत्त आहे. पुढील तपास वाकड पोलीस करीत आहेत.
एखाद्या घटनेचा जाब विचारण्याचा अधिकार असला, तरी कायदा हातात घेऊन मारहाण करणे हा पर्याय नाही. **एका वादाचे रूपांतर थेट खुनात झाल्याने एका व्यक्तीचा जीव गेला आणि चार जणांना कारागृहाची वाट धरावी लागली**, अशी ही गंभीर घटना आहे.
बातमीदार : श्री. गणेश मारुती जोशी ( हिंदजागर ऑनलाईन न्यूज पोर्टल, पुणे )
