पुणे | प्रतिनिधी – पुण्यातील औषध वितरण व्यवसायात मोठ्या आर्थिक फसवणुकीचा आरोप असलेल्या प्रकरणात **जयेश वसंत जैन याला पुणे पोलिसांच्या आर्थिक गुन्हे शाखेने अटक केली आहे.** सदाशिव पेठेतील घाऊक औषध वितरकांकडून उधारीवर मोठ्या प्रमाणात औषधे घेऊन त्यांचे पैसे न दिल्याचा आरोप असून, या प्रकरणांमध्ये सुमारे १८ कोटी रुपयांच्या फसवणुकीसंदर्भात गुन्हे दाखल असल्याची माहिती समोर आली आहे.
पोलिसांकडे दाखल झालेल्या तक्रारींनुसार, सुरुवातीला औषधांची खरेदी करून वेळेवर पैसे देत वितरकांचा विश्वास संपादन केला जात असे. त्यानंतर उधारीवर मोठ्या प्रमाणात औषधांचा माल घेण्यात येत होता. जयेश जैन मोठ्या संस्थांना औषधांचा पुरवठा करतो, असे सांगून त्याला उधारीवर माल देण्यास वितरकांना सांगण्यात आल्याचा आरोप आहे.या प्रकरणात सोनाली लक्ष्मण गिरीगोसावी हिचेही नाव समोर आले आहे. पोलिसांच्या माहितीनुसार, २०२४ पासून अशा स्वरूपाचे व्यवहार झाल्याचे पूर्वीच्या गुन्ह्यांच्या तपासातून समोर आले आहे. संबंधित प्रकरणांचा तपास आर्थिक गुन्हे शाखेकडे वर्ग करण्यात आला आहे.
सदाशिव पेठेतील वितरकाची तब्बल ₹62.99 लाखांची फसवणूक
सदाशिव पेठेत मीना फार्मा नावाने घाऊक औषध विक्रीचा व्यवसाय करणारे टोनी अँथनी फर्नांडिस यांनीही विश्रामबाग पोलीस ठाण्यात तक्रार दाखल केली आहे. तक्रारीनुसार, ६ मार्च ते ३ मे २०२५ या कालावधीत त्यांच्याकडून ₹62 लाख 99 हजार 44 रुपयांची औषधे घेण्यात आली; मात्र त्याचे पैसे न मिळाल्याचा आरोप आहे. या प्रकरणात दिलेले धनादेश खात्यात पुरेशी रक्कम नसल्याने परत आल्याचेही संबंधित वृत्तांमध्ये नमूद करण्यात आले आहे. पैसे मिळतील या अपेक्षेने तक्रारदाराने बराच काळ प्रतीक्षा केल्यानंतर अखेर पोलिसांकडे धाव घेतल्याचे सांगण्यात आले आहे.
आर्थिक व्यवहारांची कसून चौकशी
औषध वितरकांकडून मोठ्या प्रमाणावर माल उचलणे, उधारीचे व्यवहार, देयके आणि संबंधित आर्थिक व्यवहारांचा तपास आता पोलिसांकडून केला जात आहे. जयेश जैनच्या अटकेनंतर या प्रकरणाशी संबंधित आर्थिक व्यवहारांची आणखी माहिती तपासातून समोर येण्याची शक्यता आहे.या प्रकरणातील आरोपांची सत्यता आणि प्रत्येक संबंधित व्यक्तीची भूमिका पोलिस तपास व पुढील न्यायालयीन प्रक्रियेत स्पष्ट होणार आहे.
प्रतिनिधी : श्री. गणेश मारुती जोशी
