पुणे | बातमीदार – मतदार याद्यांच्या विशेष सखोल पुनरीक्षण अर्थात ‘एसआयआर’ मोहिमेनंतर पुणे शहरातील मतदारसंख्येत मोठा बदल होण्याची शक्यता निर्माण झाली आहे. शहरातील आठ विधानसभा मतदारसंघांमधील तब्बल १४ लाख ८५ हजार ६० म्हणजेच सुमारे ४२ टक्के मतदारांची नावे प्रारूप मतदारयादीतून वगळली जाण्याची शक्यता आहे.
पुणे शहरातील वडगाव शेरी, शिवाजीनगर, कोथरूड, खडकवासला, पर्वती, हडपसर, पुणे कॅन्टोन्मेंट आणि कसबा पेठ या आठ विधानसभा मतदारसंघांत यापूर्वी एकूण ३४ लाख ६५ हजार ३०५ मतदार नोंदणीकृत होते. उपलब्ध संभाव्य आकडेवारीनुसार, एसआयआर मोहिमेनंतर ही संख्या सुमारे १९ लाख ८० हजारांपर्यंत खाली येऊ शकते.
या छाननीचा सर्वाधिक परिणाम हडपसर विधानसभा मतदारसंघावर होण्याची शक्यता आहे. हडपसरमधील २ लाख ९८ हजार ५४६ मतदारांची नावे, म्हणजेच एकूण मतदारांच्या सुमारे ४५.८३ टक्के नावे , वगळली जाण्याची शक्यता व्यक्त करण्यात आली आहे.
खडकवासला मतदारसंघातही मोठा बदल अपेक्षित असून, येथील २ लाख ७८ हजार ४४९ म्हणजेच ४६.६३ टक्के मतदारांची नावे वगळली जाऊ शकतात. प्रमाणाच्या दृष्टीने आठही मतदारसंघांत खडकवासल्यातील आकडा सर्वाधिक आहे.
कोथरूड मतदारसंघातून २ लाख ७ हजार २७९ मतदारांची नावे वगळली जाण्याची शक्यता असून, हे प्रमाण ४६.२६ टक्के आहे. वडगाव शेरीत २ लाख ४ हजार १०२ म्हणजे ३९.३४ टक्के, तर पर्वती मतदारसंघात १ लाख ५२ हजार २० म्हणजे ४०.९५ टक्के मतदारांची नावे कमी होण्याची शक्यता आहे.
शिवाजीनगर मतदारसंघात १ लाख ३० हजार २३३ म्हणजे ४४.४७ टक्के, तर पुणे कॅन्टोन्मेंट मतदारसंघात **१ लाख २१ हजार ८४६ म्हणजे ४०.४६ टक्के मतदारांची नावे** वगळली जाऊ शकतात.
कसबा पेठ मतदारसंघात सर्वांत कमी ९२ हजार ५८५ मतदारांची नावे वगळण्याची शक्यता आहे. हे प्रमाण तेथील एकूण मतदारांच्या ३२.५२ टक्के इतके आहे.
#कोणत्या मतदारसंघात किती नावे वगळण्याची शक्यता?
| विधानसभा मतदारसंघ | संभाव्य वगळलेली नावे | प्रमाण |
| हडपसर | २,९८,५४६ | ४५.८३% |
| खडकवासला | २,७८,४४९ | ४६.६३% |
| कोथरूड | २,०७,२७९ | ४६.२६% |
| वडगाव शेरी | २,०४,१०२ | ३९.३४% |
| पर्वती | १,५२,०२० | ४०.९५% |
| शिवाजीनगर | १,३०,२३३ | ४४.४७% |
| पुणे कॅन्टोन्मेंट | १,२१,८४६ | ४०.४६% |
| कसबा पेठ | ९२,५८५ | ३२.५२% |
मतदारयादीतील इतक्या मोठ्या बदलामुळे आगामी निवडणुकांचे राजकीय गणितही बदलण्याची शक्यता आहे. मात्र, ही प्रारूप आणि संभाव्य आकडेवारी असल्याने नागरिकांनी आपले नाव मतदारयादीत आहे की नाही, याची अधिकृत निवडणूक संकेतस्थळ किंवा संबंधित मतदार नोंदणी कार्यालयात तपासणी करणे आवश्यक आहे.पात्र नागरिकाचे नाव चुकून वगळले असल्यास संबंधित व्यक्तीने निर्धारित मुदतीत आवश्यक कागदपत्रांसह दावा किंवा हरकत नोंदवावी. अंतिम मतदारयादी प्रसिद्ध झाल्यानंतरच वगळलेल्या नावांची निश्चित संख्या स्पष्ट होणार आहे.
बातमीदार : श्री. गणेश मारुती जोशी हिंद जागर ऑनलाईन न्यूज डिजिटल पोर्टल
